Noong Agosto 8, 2012 ang ika-24 anibersaryo ng pinakamalawak na paghihimagsik sa kasaysayan ng pulitika ng Myanmar – ang pag-aalsa noong 1988 [en] bilang panawagan ng demokrasya sa bansa. Bagamat sa mga nakalipas na mga taon naging tahimik ang paggunita sa nasabing anibersaryo, ang pag-alala ngayong taon ay dadaluhan ng mga pinuno ng makasaysayang pag-aalsa, kabilang na sina Min Ko Naing [en], Ko Ko Gyi at iba pa.

Mula sa Facebook page na Myanmar Political Review [my], na sinimulan noong Hulyo at nakalikom sa loob lamang ng ilang araw ng higit 1,000 fans, makikita ang ilang pambihirang litrato na kinunan noong 1988. Narito ang ilan sa mga natatanging larawan ng mga kaganapan noon:

Kilos-protesta noong 1988. Litrato mula sa Myanmar Political Review sa Facebook.

Sigaw ng mga kabataang mag-aaral. Litrato mula sa Myanmar Political Review sa Facebook.

Mula sa paliparan ng Yangon, sumali sa demonstrasyon ang pulisya. Litrato mula sa Myanmar Political Review sa Facebook.

Sagupaan sa pagitan ng mga demonstrador at ng mga otoridad. Litrato mula sa Myanmar Political Review sa Facebook.

Talumpati ni Aung San Suu Kyi sa Shwedagon pagoda noong 1988. Litrato mula sa Myanmar Political Review sa Facebook.

Si Min Ko Naing, pangulo ng All Burma Federation of Student Union sa kasagsagan ng rebolusyon. Litrato mula sa Myanmar Political Review sa Facebook.

Ibinahagi naman ni MFGhiphop ang isang bidyo sa YouTube [en] na naglalaman ng dalawang awit na nagpapaalala sa mga kaganapan noong 1988:

Ngayong taon, opisyal na nagpadala [my] ng dalawang delegado ang pangulo ng Myanmar si Thein Sein sa monasteryo kung saan ginanap ang isang seremonya ng donasyon at pag-aalay para sa Araw ng Buddhist Full Moon noong ika-7 ng Agosto, kasama ang mga kasapi ng 88 Generation Students Organisation.

Nagbigay ng donasyon ang dalawang ministro, mula sa Ministeryo ng Kalakal at Ministeryo ng Transportasyon, sa monasteryo at sa mga miyembro ng 88 Generation Students Organisation.

Tinanggap ni Min Ko Naing, Lider ng 88 Generation, ang donasyon mula sa isang ministro ng pamahalaan noong ika-7 ng Agosto, 2012. Litrato mula sa Facebook page ng 88 Generation Students.

Ikinatuwa naman ng maraming taga-Myanmar ang balita ng pagkakamabutihang-loob ng mga aktibista at mga pulitiko sa bansa.